Que s'ei devut passar en 1593 o 94 : me'n brembi pas tròp plan .Qu'ac poderatz espiar sus internet se voletz. Qu'èra ua annada quan torrava: Que hasèva mei fred qu'en 1954. La nèu qu'èra arribada tot d'un còp sense prevénguer. Alavetz n'i avèva pas nada meteo com auèi e pas gran causa tanpauc... Enric IV que s'èra passat la dimenjada ( Plan solide ne parlavan pas enqüèra de dimenjada a la fin deu sègle setzau !) au castèth deu beròi Bellegarda. Aquiu, com de costuma, qu'avèva hestejat a tot hòrt damb la Gabrièla d' Estre e que'u calèva se'n tornar viste hèit pr'amor la reina Margòt qu'èra harta de tot aquò . E l' Enric qu'ac sabèva plan, Catarina de Medicis, la bèla mair, que s' anava embijarrar un còp de mei. Estosse auèi, lo mei brac entà se’n tornar qu'èra estat per Lanamesa : qu'ei çò que hèn adara quan son pressats ! Pr'aquò d'aqueth temps n'i avèva pas l'autorota e pendent l'ivèrn la còsta de Capvèrn de tan qu'èi terribla que l'aperam la Rampa! Donc l' Enric qu'avèva causit la rota de Shishan : se disèva tanben que peus camins de Shishan s'escaijèva de còps d'encontrar quauquas pastoras aimablas com lo Verd Galant las aimavan hòrt. D'aquò pas digun n'ac pòt assegurar adara totun...
Donc, lo nòste Enric qu'arribèc a malaise au som de la còsta de las Molièras : qu'ac sabetz tots qu'ei la rota de Simòrra...Aquiu, que i a adara lo castèth d'aiga . E entà devarar de cap a Shishan la còsta qu'ei tenenta e las causas que virèn mau...en quauquas minutas la tempèsta de nèu que's lhèva e qu'ac amaga tot. Que cau díser, quan l' Enric holejava atau, n'i avèva pas qu'òmes damb eth : Quauques vailets, lo fidèu Sulat, e n'èra pas damb lo carròça deus grans jorns. Lo rei qui bevèva Juranson dempèi la soa naishença qu'aimava tanben lo claret, que dirén auèi lo vin roi que tasca. Alavetz que s'avèva hèit seguir un barricòt plen d'aqueth vin, hòrt pelut, qu'anava plan damb l'alh que s'estimava mei que tot. Vaqui lo nòste Enric, lo son equipatge blocat au som de la còsta de las Molièras. Los chivaus n'èran pas herrats entà la nèu. N'i avèva pas de haure a detz legas a l'entorn e lo carròça qu'èra en-honsat dinc aus èishs. Ne podèvan pas passar la nueit aquiu. Qu'èra tròp dangerós ; qu'èran tròp a malaise e un rei, estosse a córrer la patantèina, ne devèva pas acabar tau com Hibernatus ! Còste que còste que calèva arribar a Shishan. L' Enric que devarèc deu carròça e hòrt contrariat, damb los vailets, que's botèc a possar . Aqueth que carrinca, que trantalha, mes ne mauta pas.
Sordeish, vaqui lo barricòt lançat capvath la còsta e que s'esbrigalha sus la rota. Lo vin tant aimat que s'esparrica dens la nèu blanca tau com un torrent de sang e las doèlas que s'eslissan dinc au varat quauques metres enlà.
Per tan contrariat qu'estosse, lo Noste Enric ne va va demorar a chepicar o plorar. Qu'a ua idea fulguranta que'u passa peu cap . Que gaha duas doèlas, ua devath cada pè : mes qu'ei mau agit entà demorar dessús . Nat problèma ! Que 's tira las bridas aus chivaus e que's liga las taulas a l'entorn de las camas. Estabornit, Sully que hè atau. Que'u cau seguir au son rei ! En tot s'emparar sus la hampa deu son escut, darrigat viste hèit, l' Enric que's botèc a devarar a hum de calhau la còsta, roja pr'amor deu vin. Que va mei anar mei viste, mes que mestreja la causa plan en tot seguir la dralha deu vin perdut. Avuglat per la nèu que continua pr’aquò atau en tot saber qu'ei sus la bona tralha. N'i a pas nada auta de tot biais ! Ne sap pas arren sus la teoria deus fluides mes aqueth Gascon de bona traca qu'a tostemps sabut s'ac virar d'un maupàs, e mei d'un còp !
Per instint, que tròba lo son balanç suu pè dret puish suu pè esquèr ; que s'arronça en tot virar adaise quitament a l'endret mei terrible on i a pas guaire lo monde deishavan lordèras. N'èra pas enqüèra la posicion de l'ueu o la flexion perfèita deus jolhs e peus puristas que' i auré quauquarren a díser sus l'aerodinamisme de las causas : las taulas ne son pas apariadas com cau, lo còs qu'ei tròp regde, mes aquò rai ! Per artisanaus que siin, las fixacions que tenguen lo còp tanben, e qu'ei a seguir la colada de vin roi, plan espessa e que'u balha ajuda. Mei prudent, Sully que demòra a l'endarrèr en tot har lo caçanèu e qu'arriba en baish tanben, quilhat sus las doèlas com lo rei ! Ohh !
Au nivèu deu pont, que va un drin en haut : qu'an acabat la devarada ! Adara n'i avèva pas qu'a logar un atelatge a la relhèva de pòsta pròche e tornar gahar la rota de Pau, a l'esconut, peus camins mei agits. Pr'aquò que venguèvan de s'escaiger a ua de las hèitas esportivas de las bèras : la prumèra devarada d'ua pista roja en esqui..que los cronicaires d'aqueth temps ne gausèn pas contar publicament...Alavetz que's passèc atau, a Shishan, ...per ma fe de Gascon !